Шоҳруҳ рэпер лицензиядан маҳрум қилингани учун эстрада оламида кўринмай қолгани ҳақидаги миш-мишларга муносабат билдирди. Хонанда бу ҳақда Instagram’даги саҳифасида хабар қолдирган, мазкур хабар хонанданинг Facebook’даги саҳифасида ҳам қайта чоп этилган.
Хонанда лицензиясидан маҳрум этилгани ҳақидаги гап-сўзларга жавобан, 2012—2015 йилларда олган лицензия намуналари фотосуратларини келтирган, суратда 2015 йил 25 августда берилган лицензия намунаси ҳам бор. «Ҳар уч ойда янгилаб тураман», — дейди Шоҳруҳ.
«Кўп йиллардан бери эстрадага чиқмаслигим сабаби, ўзимга яраша бошқа ишларим ҳам бор. Мусиқа охирги даражали бўлиб қолган, мусиқа мен учун хобби эканини илк бор эстрадага чиққанимда ҳам айтганман. Бўш вақтимда мусиқага вақт ажратаман, мени кузатиб бораётган мухлислар буни жуда яхши билади», — дейди рэпер.
«Ҳар хил ёлғон гап тарқатадиганлар ва баъзи оммавий ахборот воситаларига маслаҳатим — нимадир дейишдан аввал мен каби далиллар келтиришсин», — деди Шоҳруҳ рэпер. Унинг сўзларига кўра, «Ўзбекнаво» эстрада бирлашмаси «ҳеч қачон ҳеч кимни бесабаб лицензиядан маҳрум қилмайди».
Изоҳ (0)