6 январь, чоршанба куни АҚШнинг Жоржия штатидаги Буфорд аҳоли пунктида қуролланган эркак икки ёшли ўғлини отиб ташлади ва ўз жонига қасд қилди. Бунгача 43 ёшли Тай Хо 18 соат давомида болани гаров тариқасида ушлаб турган, дея хабар беради «ТАСС».
Полиция вакили Мишель Пиеранинг маълум қилишича, ота фарзандини зўрлик билан тутиб турган уй штурм қилинмаган. Бу ерга полиция махсус бўлинмасини зудлик билан жўнатиш тўғрисидаги қарор уйда ўқ овозлари эшитилганидан сўнг қабул қилинган. Бўлинма бинога киришга муваффақ бўлганда болакайнинг жасадига дуч келади, унинг отаси эса полиция эшикни бузаётганда ўзини отиб ўлдирган.
Айтишларича, эркак дастлаб рафиқаси ва яна бир неча кишини гаровга олган. Кейинчалик ўғлини олиб қолиб, қолганларни қўйиб юборишга рози бўлган.
Эслатиб ўтамиз, олдинроқ АҚШнинг Жоржия штатидаги меҳмонхонада аёл ва 11 нафар болани гаровга олган америкалик ўз жонига қасд қилганди. Шунингдек, АҚШ президенти Барак Обама мамлакатда ўқ узишлар оқибатида келиб чиққан ўлим ҳодисаларини ёдга олиб, кўзига ёш келгани ҳақида хабар берилганди.
Изоҳ (0)