Эрон президенти Ҳасан Руҳоний Ислом Республикасининг Олий суди раиси оятуллоҳ Содиқ Амоли Ларижонийга мактуб йўллаб, Саудия Арабистонининг Теҳрон ва Машҳаддаги дипломатик ваколатхоналарига ҳужум қилганларни жазолашни сўради. Бу ҳақда «ТАСС» хабар бермоқда.
Руҳоний ўз мактубида «бундай жиноятлар мамлакат миллий хавфсизлигига зарар келтириши, Эрон ҳукумати учун ҳақоратли эканлиги ва Ислом Республикаси раҳбарияти имижига зарар етказиши»ни қайд этган.
Шиа уламоаси Нимр ан-Нимрнинг қатл этилгани туфайли 2 январдан 3 январга ўтар кечаси Теҳрондаги Саудия Арабистони элчихонаси ва Қиролликнинг Машҳаддаги консуллигига тажовузкор кайфиятдаги намойишчилар ҳужум уюштирди. 3 январь куни дипломатик ваколатхоналарга ҳужум қилган 40 га яқин киши қўлга олинди. Бироқ Саудия Арабистони шу куннинг ўзида Эрон билан дипломатик алоқаларни узди. Унинг ортидан Судан ва Баҳрайн ҳам шундай йўл тутди.
БАА Эрон билан дипломатик алоқалар даражасини пасайтирди. Кувайт маслаҳатлашув учун ўз элчисини Теҳрондан чақириб олди. Африканинг Жибути Республикаси ҳам Эрон билан дипломатик алоқаларни тўхтатишга қарор қилди.
Изоҳ (0)