Change.org сайтида Россия президенти Владимир Путин маъмуриятига йўналтирилган петиция пайдо бўлди, унда Приморье сафари боғидаги йўлбарс Амур ва эчки Тимурнинг дўстлик ҳикоясини кадрларга муҳрлаш таклиф қилинди, деб ёзади «РИА Новости».
Мурожаат муаллифи Олег Кожегудов жониворлар суратларини ижтимоий рекламада қўллашни тавсия этмоқда. «Бизнинг шафқатсиз замонамизда меҳр-муҳаббат тарғиботи жуда зарур», — деди петиция ташаббускори. Уни ҳозиргача 90 киши имзолади.
28 декабрь куни Приморье сафари боғи директори йўлбарс Амур ва эчки Тимур ҳаёти ҳақида реалити-шоу қўйилишини эълон қилди. Жониворлар ҳаётини интернет орқали кузатиш мумкин бўлади.
Аввалроқ эчки Тимур ва йўлбарс Амурнинг хулқи кейинги вақтларда бироз ўзгариб, биргаликда кам вақт ўтказадиган бўлгани хабар берилган эди.
Эслатиб ўтамиз, машҳур бўлиб кетган дўстлар – йўлбарс Амур ва эчки Тимурнинг ижтимоий тармоқлардаги шахсий саҳифалари, интернет-дўкони ва алоҳида латифалар саҳифаси очилган эди.
Изоҳ (0)