Тергов сиёсатчи Борис Немцовнинг ўлдирилиши ҳақидаги иш бўйича Заур Дадаев, Шадид Губашев, Хамзат Бахаев ва Тамерлан Эскерхановга нисбатан якуний айблов эълон қилди, дея хабар бермоқда «ТАСС».
Айблов Россия Жиноят кодексининг 105-моддаси 2-қисмининг «ж» ва «з» бандлари («Шахслар гуруҳи томонидан ғаразли мақсадда ёки ёлланиб, аввалдан тил бириктириш орқали амалга оширилган қотиллик») бўйича эълон қилинди.
Жиноий ишнинг яна бир фигуранти — Анзор Губашевнинг адвокати хизмат сафарида бўлгани туфайли, унга нисбатан айб кейинроқ қўйилади.
Аввалроқ Россия Тергов қўмитаси Руслан Муҳиддиновни «амалга оширилган жиноятлар буюртмачиси ва ташкилотчиси» деб ҳисоблашини эълон қилган эди. Марҳум Борис Немцов оиласининг вакили Вадим Прохоров эса Россия Тергов қўмитасининг сиёсатчини ўлдиришни Руслан Муҳиддинов буюртма қилгани ҳақидаги баёнотига норозилик билдирди. «Муҳиддинов ташкилотчилардан бири ҳисобланади, бунинг устига, у энг пастки бўғиндан. У Руслан Геремеевнинг ҳайдовчиси бўлган. Қотилликни ташкил қилиш учун унда на шахсий мақсад, на пул бор», — деди адвокат.
Изоҳ (0)