Ўзбекистон Марказий банки 2015 йил 29 декабрдан бошлаб валюта операциялари бўйича бухгалтерия ҳисоби, статистик ва бошқа ҳисоботларни юритиш, шунингдек, божхона ва бошқа мажбурий тўловлари учун хорижий валюталарнинг сўмга нисбатан янги қийматларини белгилади.
Унга кўра, 1 АҚШ доллари 2809 сўм 98 тийин этиб белгиланди. Бу 22 декабрдаги курсга нисбатан роппа-роса 15 сўмга кўп.
Бунгача Ўзбекистонда долларнинг расмий курси кетма-кет ўн икки ҳафтадан бери камида 14 сўмга қимматлашаётган эди. Ундан аввал эса АҚШ валютаси 4—6 сўм атрофида юқорилаб бораётган эди.
«Газета.uz»нинг ёзишича, Ўзбекистон сўми 2015 йил бошидан бери (2422,40 сўм) долларга нисбатан 387,58 сўмга ёки 15,9 фоизга қадрсизланди. Эслатиб ўтамиз, 2014 йил давомида доллар сўмга нисбатан 9,9 фоизга ўсган эди.
29 декабрдан эътиборан 1 евро қиймати 3074 сўм 19 тийин (22 декабрдаги курсга нисбатан 11 сўм 53 тийин қиммат), 1 Россия рубли эса 39 сўм 99 тийин (22 декабрдаги курсга нисбатан 80 тийинга қиммат) этиб белгиланган.
Эслатиб ўтамиз, валюта қийматини белгилаш чоғида Марказий банк мазкур валюталарни ушбу қийматда сотиш ёки сотиб олиш мажбуриятини олмаган.
Изоҳ (0)