Суриядаги мухолифат исёнчилар етакчисининг ўлдирилиши ёмон оқибатларга олиб келиши ҳақида огоҳлантирди

Сурия мухолифати, исёнчи гуруҳлардан бири «Жайш ал-Ислом» («Ислом армияси»)нинг қўмондони ўлдирилгани Суриядаги музокаралар жараёнига салбий таъсир қилиши мумкинлиги ҳақида огоҳлантирди, деб ёзади «РБК».

Сурия мухолифатининг музокаралар бўйича олий қўмитаси координатори Риёд Ҳижоб Захран Аллушнинг ўлдирилиши жиддий ҳодиса эканлиги ва Суриядаги сиёсий жараёнга таъсир ўтказишини айтди.

Унинг сўзларига кўра, исёнчилар етакчисига берилган зарба Сурия мухолифатининг Ар-Риёддаги анжуманда ташкил қилинган музокаралар олий қўмитасига қаратилган.

Ҳижоб Аллушнинг ўлдирилиши Суриядаги тартибга солиш жараёнида айнан қандай оқибатларга олиб келишига аниқлик киритмади.

Эслатиб ўтамиз, 25 декабрь, жума куни Дамашқ яқинида «Жайш ал-Ислом» гуруҳи етакчиси Захран Аллуш ўлдирилган эди. Дамашқдан 12 километр узоқликда бўлган Дума шаҳри атрофидаги Отая аҳоли пунктида жойлашган жангарилар штабига уюштирилган авиаҳужумлар натижасида жами 90 нафар жангари ўлдирилган ва жароҳат олган. Аллушдан ташқари, яна бир жангари гуруҳ — «Фейлак Раҳмон» қўмондони Абдулносир Шамир ҳам йўқ қилинган.

Кейинроқ «Жайш ал-Ислом» гуруҳи Аллуш ўрнига янги раҳбар сайлади. «Ал Маядин» телеканалининг маълум қилишича, Аллуш ўрнини Абу Химам Буядан эгаллаган.