Туркия бош вазири Путиннинг сўзларига табассум билан муносабатда бўлишни таклиф қилди

Туркия бош вазири Аҳмет Давутўғли Россия президенти Владимир Путиннинг Туркияда «судралувчи исломлаштириш» жараёни кетаётгани ва турклар «Америка раҳбариятини ялашни хоҳлаши» ҳақидаги фикрларига муносабат билдираркан, бу сўзлар жиддий қабул қилинса, ҳақорат сифатида баҳоланиши мумкинлигини айтиб ўтди. «Шу сабабли ҳам бу сўзларга табассум билан муносабатда бўлиш керак», — дея, Давутўғлининг сўзларидан иқтибос келтирмоқда «РБК».

Давутўғли Россия президенти бундан бир ой олдин, аниқроғи, Су-24 билан боғлиқ воқеадан аввал ҳам шундай фикрлар билдирган бўлармиди, деб савол қўйди. «Бирдан Туркия исломлаштириш жараёни кетаётган мусулмон мамлакатга, АҚШ билан жуда яқин алоқаларга эга давлатга айланиб қолди. Бир ой аввал шундай десанг, сенсация бўларди. Ҳозир эса бундай баёнотларни контекстдан ташқари қабул қилиб бўлмайди», — деди Туркия бош вазири.

Ражаб Тоййиб Эрдўғон оиласининг коррупциявий ишларга алоқадорлиги борасида Путин баёнотига муносабат билдираркан, Давутўғли бу сўзларни «советча ташвиқот» деб атади. Туркия бош вазирининг сўзларига кўра, бу каби сўзлар Путин совет даврида КГБ (Давлат хавфсизлик қўмитаси)да ишлагани билан боғлиқ. «Бироқ у даврлар ўтмишда қолди», — деди Давутўғли.