Тошкент шаҳрида 2015 йилнинг январь—ноябрь ойларида вояга етмаганлар томонидан содир этилган жиноятларнинг сони 2014 йилнинг шу даврига нисбатан сезиларли камайди. Бу ҳақда, Тошкент шаҳар прокурори Мирзоҳид Обидовга асосланиб, «Ҳуқуқ» газетаси хабар бермоқда.
Прокурорнинг таъкидлашича, вояга етмаган ўқувчилар таълим муассасаларига ўзлари билан совуқ қуроллар олиб келиб, айрим «зўравон» ёшлар ўртоқлари билан урушиб қолганда уларни жабрланишигача бориб етмоқда.
«Мисол учун, 2015 йилнинг сентябрь ойида Учтепа туманидаги Тошкент қурилиш коммунал касб-ҳунар коллежи ўқувчиси коллеж ҳовлисида ўз тенгдошига, Тошкент солиқ коллежи ўқувчиси ўз тенгдошига, Шарқшунослик институти қошидаги Олмазор академик лицейи ўқувчиси бирга ўқийдиган ўртоғига пичоқ билан тан жароҳати етказган», — дейди шаҳар прокурори.
Қайд этишларича, 2014 йилда вояга етмаганлар ўртасида пичоқ ва бошқа совуқ қуроллар орқали ҳуқуқбузарлик содир этиш ҳолатлари бир мунча ошганлиги кузатилган эди. Шу муносабат билан, 2015 йил февралида Тошкент шаҳар ҳокими томонидан «Тошкент шаҳрида ёшлар ўртасида жиноятчилик ва ҳуқуқбузарликларнинг олдини олишга қаратилган қўшимча чора-тадбирлар тўғрисида»ги қарор қабул қилинган эди.
Изоҳ (0)