Toshkent shahrida 2015-yilning yanvar—noyabr oylarida voyaga yetmaganlar tomonidan sodir etilgan jinoyatlarning soni 2014-yilning shu davriga nisbatan sezilarli kamaydi. Bu haqda, Toshkent shahar prokurori Mirzohid Obidovga asoslanib, “Huquq” gazetasi xabar bermoqda.
Prokurorning ta’kidlashicha, voyaga yetmagan o‘quvchilar ta’lim muassasalariga o‘zlari bilan sovuq qurollar olib kelib, ayrim “zo‘ravon” yoshlar o‘rtoqlari bilan urushib qolganda ularni jabrlanishigacha borib yetmoqda.
“Misol uchun, 2015-yilning sentabr oyida Uchtepa tumanidagi Toshkent qurilish kommunal kasb-hunar kolleji o‘quvchisi kollej hovlisida o‘z tengdoshiga, Toshkent soliq kolleji o‘quvchisi o‘z tengdoshiga, Sharqshunoslik instituti qoshidagi Olmazor akademik litseyi o‘quvchisi birga o‘qiydigan o‘rtog‘iga pichoq bilan tan jarohati yetkazgan”, — deydi shahar prokurori.
Qayd etishlaricha, 2014-yilda voyaga yetmaganlar o‘rtasida pichoq va boshqa sovuq qurollar orqali huquqbuzarlik sodir etish holatlari bir muncha oshganligi kuzatilgan edi. Shu munosabat bilan, 2015-yil fevralida Toshkent shahar hokimi tomonidan “Toshkent shahrida yoshlar o‘rtasida jinoyatchilik va huquqbuzarliklarning oldini olishga qaratilgan qo‘shimcha chora-tadbirlar to‘g‘risida”gi qaror qabul qilingan edi.
Izoh (0)