Қозоғистон мустақиллигига 16 декабрь куни 24 йил тўлгани муносабати билан, «Google Қозоғистон»нинг бош саҳифасида айнан шу санага бағишланган дудл (doodle) пайдо бўлди.
Google бундан аввал ҳам Қозоғистонни мустақиллик куни билан табриклаган — 2011 йили, Қозоғистон мустақиллигининг 20 йиллигида «Google Қозоғистон» бош саҳифасида шу санага бағишланган дудл пайдо бўлганди. Шундай қилиб, Google иккинчи марта фақат Қозоғистонга аталган дудлни ишлаб чиқиб, уни минтақавий лойиҳаси бош саҳифасига жойлаштирди.
«Google Қозоғистон»нинг бош саҳифасида турли йилларда Наврўз, Ўқитувчилар куни, Болаларни ҳимоя қилиш куни, Билимлар куни — яъни, бир вақтнинг ўзида бир неча мамлакатларда бир хилда нишонланадиган байрам ва саналар муносабати билан, шунингдек, асосан Россия (ва собиқ СССР) билан боғлиқ саналар (шоир Александр Пушкиннинг туғилган куни, рассом Илья Репиннинг туғилган куни, артист Владимир Висоцкий таваллудининг 74 йиллиги ва ҳ.к.) сабаб тайёрланган дудллар чиқарилган.
Эътиборга молик томони, Google Марказий Осиё республикаларининг бошқа ҳеч бирига, жумладан, Ўзбекистонга ҳам бундай эътибор қаратмаган. «Дудллар архиви»га кўра, «Google Ўзбекистон» бош саҳифасида шу вақтгача 10 марта Google’нинг одатий логотипидан фарқли рамз пайдо бўлган бўлиб, уларнинг 5 таси Наврўз билан боғлиқ (қолганлари эса Россия билан — Ғалаба куни (2006 йил), Гоголнинг 200 йиллиги, Пушкиннинг туғилган куни, Илья Репиннинг туғилган куни, Висоцкийнинг 74 йиллиги).
Марказий Осиё минтақасига нисбатан яқин Кавказда ҳам Google ҳар бир мустақил республикани алоҳида қайд этиб ўтган. Хусусан, Арманистон ва Грузияни мустақиллик куни билан табриклаган, Озарбайжонни нафақат мустақиллик куни билан, балки ушбу мамлакатнинг таниқли бастакори ва мусиқашуноси Узеир Ҳожибековни 128 йиллиги билан қутлаган.
Google Doodles саҳифасида ёзилишича, дудллар учун ғояларни ҳам компания ходимлари, ҳам Google фойдаланувчилари тақдим этади. Таклифларни proposals@google.com электрон почта манзилига йўллаш мумкин. Ҳар бир дудл устида рассомлар ва муҳандислар гуруҳи иш олиб боради, баъзи дудлларни ишлаб чиқиш жараёни, The Guardian’нинг қайд этишича, бир неча ойгача вақт олади.
Қизиқ факт: Абу Райҳон Беруний туғилган жойи ҳозирги Қорақалпоғистон ҳудудида жойлашган ва 1957 йилдан бери Беруний деб аталади. Google эса 2012 йил 4 сентабрида — Беруний таваллудига 1039 йил тўлган кунда Афғонистон, Ироқ, Саудия Арабистони, БАА, Қатар, Уммон, Баҳрайн, Кувайт, Иордания, Миср, Ливия, Тунис, Жазоир ва Марокашдаги Google бош саҳифаларига айнан Берунийга аталган дудлни чиқарган.
Изоҳ (0)