Qozog‘iston mustaqilligiga 16-dekabr kuni 24 yil to‘lgani munosabati bilan, “Google Qozog‘iston”ning bosh sahifasida aynan shu sanaga bag‘ishlangan dudl (doodle) paydo bo‘ldi.
Google bundan avval ham Qozog‘istonni mustaqillik kuni bilan tabriklagan — 2011-yili, Qozog‘iston mustaqilligining 20 yilligida “Google Qozog‘iston” bosh sahifasida shu sanaga bag‘ishlangan dudl paydo bo‘lgandi. Shunday qilib, Google ikkinchi marta faqat Qozog‘istonga atalgan dudlni ishlab chiqib, uni mintaqaviy loyihasi bosh sahifasiga joylashtirdi.
“Google Qozog‘iston”ning bosh sahifasida turli yillarda Navro‘z, O‘qituvchilar kuni, Bolalarni himoya qilish kuni, Bilimlar kuni — ya’ni, bir vaqtning o‘zida bir necha mamlakatlarda bir xilda nishonlanadigan bayram va sanalar munosabati bilan, shuningdek, asosan Rossiya (va sobiq SSSR) bilan bog‘liq sanalar (shoir Aleksandr Pushkinning tug‘ilgan kuni, rassom Ilya Repinning tug‘ilgan kuni, artist Vladimir Visotskiy tavalludining 74 yilligi va h.k.) sabab tayyorlangan dudllar chiqarilgan.
E’tiborga molik tomoni, Google Markaziy Osiyo respublikalarining boshqa hech biriga, jumladan, O‘zbekistonga ham bunday e’tibor qaratmagan. “Dudllar arxivi”ga ko‘ra, “Google O‘zbekiston” bosh sahifasida shu vaqtgacha 10 marta Google’ning odatiy logotipidan farqli ramz paydo bo‘lgan bo‘lib, ularning 5 tasi Navro‘z bilan bog‘liq (qolganlari esa Rossiya bilan — G‘alaba kuni (2006-yil), Gogolning 200 yilligi, Pushkinning tug‘ilgan kuni, Ilya Repinning tug‘ilgan kuni, Visotskiyning 74 yilligi).
Markaziy Osiyo mintaqasiga nisbatan yaqin Kavkazda ham Google har bir mustaqil respublikani alohida qayd etib o‘tgan. Xususan, Armaniston va Gruziyani mustaqillik kuni bilan tabriklagan, Ozarbayjonni nafaqat mustaqillik kuni bilan, balki ushbu mamlakatning taniqli bastakori va musiqashunosi Uzeir Hojibekovni 128 yilligi bilan qutlagan.
Google Doodles sahifasida yozilishicha, dudllar uchun g‘oyalarni ham kompaniya xodimlari, ham Google foydalanuvchilari taqdim etadi. Takliflarni proposals@google.com elektron pochta manziliga yo‘llash mumkin. Har bir dudl ustida rassomlar va muhandislar guruhi ish olib boradi, ba’zi dudllarni ishlab chiqish jarayoni, The Guardian’ning qayd etishicha, bir necha oygacha vaqt oladi.
Qiziq fakt: Abu Rayhon Beruniy tug‘ilgan joyi hozirgi Qoraqalpog‘iston hududida joylashgan va 1957-yildan beri Beruniy deb ataladi. Google esa 2012-yil 4-sentyabrida — Beruniy tavalludiga 1039 yil to‘lgan kunda Afg‘oniston, Iroq, Saudiya Arabistoni, BAA, Qatar, Ummon, Bahrayn, Kuvayt, Iordaniya, Misr, Liviya, Tunis, Jazoir va Marokashdagi Google bosh sahifalariga aynan Beruniyga atalgan dudlni chiqargan.
Izoh (0)