Шимолий Кореянинг Кэсон шаҳрида 11—12 декабрь кунлари бўлиб ўтган КХДР ва Жанубий Корея ўртасидаги музокаралар натижасиз якунланди. Бу ҳақда Корея марказий телеграф агентлиги (КМТА) манбаларига таяниб, «ТАСС» хабар бермоқда.
Агентликнинг билдиришича, музокаралар чоғида Шимолий Корея жанубликларнинг Кимгансан курорт ҳудудига сафарларини уюштириш, 1950—1953 йиллардаги Корея уруши оқибатида ажралган оилаларни бирлаштириш, турли йўналишларда нодавлат мулоқотларини фаоллаштириш каби таклифлар билан чиққан, бироқ Жанубий Корея томони уларни муҳокама этишдан бош тортган ва музокаралар боши берк кўчага кириб қолган.
Музокараларда иштирок этган Жанубий Кореянинг бирлашиш масалалари бўйича вазир ўринбосари Хван Бу Гининг таъкидлашича, жанубликлар уруш туфайли бўлинган оилалар масаласида аниқ келишувга эришишга ҳаракат қилган, бироқ шимолликлар ушбу муаммони Кимгансан тоғларида ўзаро сайёҳлик лойиҳасини қайта тиклаш масаласи билан боғлаган. Жануб эса бунга қатъиян қарши чиққан.
Мулоқот якунлари бўйича якуний баёнот имзоланмади. Томонлар ўзаро маслаҳатлашувнинг янги санасини ҳам белгиламаган.
Изоҳ (0)