2015 йил давомида 31 та мамлакатда жами 128 нафар журналист ҳалок бўлди. Бу ҳақда Press Emblem Campaign ташкилоти тақдим этган ҳисоботга асосан «ТАСС» хабар қилмоқда.
Қурбонлар сони энг кўп Сурияда бўлиб, у ерда 11 нафар журналист ҳалок бўлган. Ундан кейин Ироқ ва Мексика ― 10 нафардан қурбон, Франция, Ливия ва Филлипинда (8 нафардан), Бразилия, Ҳиндистон, Жанубий Судан ва Яманда эса етти нафардан журналист ҳалок бўлган. Покистон ва Сомалида ― 6 нафар, Гондурасда ― 5 нафар. Украина ва Колумбияда тўрт нафардан журналист ўлдирилган. Рўйхат бўйича 16-ўринда Гватемала турибди (3 нафар). Ўн еттинчи ва ўн саккизинчи ўринларда Афғонистон ва АҚШ келтирилган (2 нафардан).
Ўтказилган тадқиқотда таъкидланишича, матбуот ходимлари фаолияти учун энг хавфли жой бўлиб 2015 йил давомида 38 нафар журналист қурбон бўлган Яқин Шарқ мамлакатлари ҳисобланмоқда. Ундан кейин Лотин Америкаси (31 нафар), Африка (18 нафар) ва Европа (13 нафар) давлатлари келтирилган.
Press Emblem Campaign ўзининг статистикасини 2006 йилда юрита бошлаган бўлиб, ҳозирга қадар дунё бўйлаб 1177 нафар матбуот ходими, яъни йилига ўртача 118 киши ҳалок бўлганлигини таъкидлади. Шу билан бирга, сўнгги тўрт йил давомида ўртача йиллик кўрсаткич 134 кишига ортганлиги маълум қилинди.
Изоҳ (0)