Xalqaro nogironlar kunini nishonlashga bag‘ishlangan festival 2015-yilning 2-dekabr kuni Radisson Blu mehmonxonasida bo‘lib o‘tdi. Bu haqda O‘zbekiston Respublikasining Mehnat va aholini ijtimoiy muhofaza qilish vazirligi axborot xizmati “Daryo”ga ma’lum qildi.
Mazkur festival nogironlar duch kelayotgan muammolar va barcha insonlarning teng huquqligini ta’minlash masalalariga jamoatchilik e’tiborini jalb etishga qaratilgan bir qator chora-tadbirlardan biri bo‘lib hisoblanadi.
Umumjahon sog‘liqni saqlash tashkilotining statistik ma’lumotlariga ko‘ra, dunyo aholisining 15 foizini nogironlar tashkil etib, mazkur aholi guruhi dunyoning eng “katta ozchiligi” bo‘lib hisoblanadi. Mazkur ko‘rsatkich yildan yilga aholi sonining oshishi, tibbiyot sohasidagi yutuqlar hamda aholining hayot davomiyligi yuksalishi oqibatida o‘sib bormoqda.
Ochiq va teng huquqlilik asosida rivojlanayotgan jamiyat qurish zaruriyatiga jamoatchilik e’tiborini qaratishning yo‘llaridan biri Xalqaro nogironlar kunini o‘tkazishdan iboratdir. Mazkur kun 1992-yil BMTning Bosh Assambleyasi tomonidan tasdiqlanib, hozirda har yili butun dunyo bo‘ylab 3-dekabr kunida nishonlanadi.
Joriy yil O‘zbekistonda bo‘lib o‘tadigan festival doirasida nogironlar ishtirokidagi konsert dasturi va fotoko‘rgazma bo‘lib o‘tishi rejalashtirilgan.
Mazkur sanani nishonlash doirasida O‘zbekiston Respublikasida mustaqillik yillarida nogironlarni ijtimoiy muhofaza qilish sohasida amalga oshirilgan ishlar va yutuqlarga bag‘ishlangan bir qator videoroliklarning milliy teleradiokompaniya orqali namoyish etilishini nazarda tutuvchi keng ko‘lamli media tadbir ham rejalashtirilgan.
Barcha tadbirlar BMTning O‘zbekistondagi vakolatxonasi, O‘zbekiston Respublikasining Mehnat va aholini ijtimoiy muhofaza qilish vazirligi va O‘zbekistonning Nodavlat-notijorat tashkilotlari (NNT) uyushmasi qoshidagi Nogironlar NNTlarining maslahatlashuv kengashi tonomidan tashkil etiladi.
Izoh (0)