Концерти вақтида жаҳли чиққан хонанда Ботир Қодиров «Истиқлол» санъат саройига зарар етказди

Хонанда Ботир Қодиров ундан сўрамай унинг оилавий ҳаёти ҳақида китоб нашр эттириб, концерти вақтида китобни сотган тележурналистдан жаҳли чиқиб, «Истиқлол» санъат саройига моддий зарар етказди. Бу ҳақда «Даракчи» газетаси хабар бермоқда.

Маълум бўлишича, 21—23 ноябрь кунлари ташкил этилган концертнинг биринчи кунида исми ошкор этилмаган тележурналист аёл Ботир Қодировнинг ўзидан рухсат сўрамаган ҳолда, унинг оилавий ҳаёти ҳақида китоб нашр эттирган ва уни концерт зали фойесида сотган.

Журналист аёлнинг концерт залига ўзи билан нечта китоб олиб келгани номаълум, аммо шу китобни сотиб олган мухлислардан бири концерт жараёнида Ботир Қодировдан китобга дастхат қўйиб беришни сўраган.

«Китобни кўрган Ботир Қодировнинг кайфияти тушиб, жаҳл устида микрофонни ташлаб, саҳнани тарк этган. Кейин ҳам ғазабини боса олмай, пардозхона эшик, ойналарини синдириб, янги ўрнатилган иситиш мосламаларини бузиб ташлаган. Натижада иситиш мосламасидан сув оқиб кетган», — дейди «Истиқлол» санъат саройи директори Исроил Ғуломов.

Ушбу воқеа сабаб, санъат саройи раҳбарияти концертнинг иккинчи ва учинчи кунларига журналистларни киритмаслик ҳақида буйруқ берган.