Қозоғистоннинг Олмаота шаҳрида стандарт шахмат бўйича «IV Central Asia Cup 2015» — Марказий Осиё кубоги бўлиб ўтди. ФИДЕ президенти Кирсан Илюмжинов соврини учун ўтказилган мусобақада Афғонистон, Қозоғистон, Қирғизистон, Тожикистон ва Ўзбекистон терма жамоалари шахматчилари иштирок этди. Бу ҳақда «Magichess.uz» сайтига таяниб, «Оламспорт» хабар бермоқда.
Аёллар ўртасидаги баҳсларда шу йил 20 ёшгача бўлган шахматчилар ўртасида мутлоқ Осиё чемпиони бўлган ўзбекистонлик Гулруҳбегим Тоҳиржонова ғолибликни қўлга киритди. Иккинчи ўринни Ўзбекистоннинг яна бир вакиласи Сарвиноз Қурбонбоева эгаллади.
Эркаклар ўртасидаги баҳсларда Ўзбекистон терма жамоаси аъзоларига совринли ўринларни эгаллаш насиб этмади. Тўққиз имкониятдан 7,5 очко тўплаган қозоғистонлик Ринат Жумабоев Марказий Осиё чемпиони бўлди. Иккинчи ўринни тожикистонлик Фаррух Аманатов эгаллаган бўлса, кучли учликка яна бир мезбон шахматчи Пётр Костенко якун ясади.
Ўзбекистонликлар орасидан энг яхши натижани Темур Игонин кўрсатди. У 9 имкониятдан 6,5 очко жамғариб, олтинчи ўринни банд этди. Ёш гроссмейтер Жаҳонгир Воҳидов эса тўққизинчи ўрин билан кифояланди.
Эътиборлиси, Қозоғистон терма жамоаси илк бор Марказий Осиё кубогини қўлга киритди. Бундан аввалги учта мусобақада кетма-кет Ўзбекистон терма жамоаси ушбу кубокка эга чиққанди.
Изоҳ (0)