Qozog‘istonning Olmaota shahrida standart shaxmat bo‘yicha “IV Central Asia Cup 2015” — Markaziy Osiyo kubogi bo‘lib o‘tdi. FIDE prezidenti Kirsan Ilyumjinov sovrini uchun o‘tkazilgan musobaqada Afg‘oniston, Qozog‘iston, Qirg‘iziston, Tojikiston va O‘zbekiston terma jamoalari shaxmatchilari ishtirok etdi. Bu haqda “Magichess.uz” saytiga tayanib, “Olamsport” xabar bermoqda.
Ayollar o‘rtasidagi bahslarda shu yil 20 yoshgacha bo‘lgan shaxmatchilar o‘rtasida mutloq Osiyo chempioni bo‘lgan o‘zbekistonlik Gulruhbegim Tohirjonova g‘oliblikni qo‘lga kiritdi. Ikkinchi o‘rinni O‘zbekistonning yana bir vakilasi Sarvinoz Qurbonboyeva egalladi.
Erkaklar o‘rtasidagi bahslarda O‘zbekiston terma jamoasi a’zolariga sovrinli o‘rinlarni egallash nasib etmadi. To‘qqiz imkoniyatdan 7,5 ochko to‘plagan qozog‘istonlik Rinat Jumaboyev Markaziy Osiyo chempioni bo‘ldi. Ikkinchi o‘rinni tojikistonlik Farrux Amanatov egallagan bo‘lsa, kuchli uchlikka yana bir mezbon shaxmatchi Pyotr Kostenko yakun yasadi.
O‘zbekistonliklar orasidan eng yaxshi natijani Temur Igonin ko‘rsatdi. U 9 imkoniyatdan 6,5 ochko jamg‘arib, oltinchi o‘rinni band etdi. Yosh grossmeyter Jahongir Vohidov esa to‘qqizinchi o‘rin bilan kifoyalandi.
E’tiborlisi, Qozog‘iston terma jamoasi ilk bor Markaziy Osiyo kubogini qo‘lga kiritdi. Bundan avvalgi uchta musobaqada ketma-ket O‘zbekiston terma jamoasi ushbu kubokka ega chiqqandi.
Izoh (0)