Тошкент лок-бўёқ заводи ҳудудида ишлаб чиқаришни диверсификациялаш ҳамда замонавий, экологик тоза технологик парк ташкил этиш бўйича инвестицион лойиҳа амалга оширилади. Бу ҳақда лойиҳани жорий этаётган Techno Color компанияси вакили маълум қилган, дея хабар беради «Газета.uz».
«Польшалик инвесторлар билан ҳамкорликда 2016—2020 йилларда янги ишлаб чиқариш бинолари қуриш ва мавжудларини реконструкция қилиш йўли билан замонавий комплекс барпо этиш режалаштирилмоқда. Лок-бўёқ ва эмаль маҳсулотлари чиқарувчи эскирган қувватлар қайта жиҳозланиб, замонавий, энергия тежовчи, ихчам заводга айлантирилади», — дея таъкидлаган Techno Color вакили.
Янги комплексда автопаркка эга логистик марказ бўлади. Шунингдек, ички бозор ва экспорт учун қурилиш материаллари, халқ истеъмоли молларини ишлаб чиқариш юзасидан лойиҳалар ҳам режалаштирилган. Уларнинг жорий этилиши натижасида 1500 та янги иш ўринлари яратилади.
Тошкент лок-бўёқ заводи 1945 йилда ўз фаолиятини бошлаган. 2014 йилда салкам 12 миллиард сўмлик 2393 тонна маҳсулот ишлаб чиқарилган.
Изоҳ (0)