АҚШнинг Мэриленд штати, Балтимор шаҳридаги халқаро аэропортда полиция бортдаги қўшнилари бўлган аёл улардан бирининг телефонига «динамит» сўзи ёзилган SMS келганлигини даъво қилгач, тўрт нафар йўловчини авиарейсдан олиб қолди. Бу ҳақда 25 ноябрь, чоршанба куни Мэриленд полицияси транспорт бошқармаси вакили Жонатан Грин маълум қилди, дея хабар беради «ТАСС».
Ҳодиса 17 ноябрь куни аэропортнинг учиш майдонига чиққан ва Чикаго шаҳрига йўл олган Spirit Airlines авиакомпанияси самолёти бортида рўй берди. Йўловчи аёллардан бири экипажга у билан ёнма-ён ўтирган қўшниси бир неча бор телефон қўнғироғи қилгани ва инглизча гаплашмагани, унинг мобил телефонида BLR Dynamit (BLR — Ҳиндистонннинг Бангалор шаҳридаги халқаро аэропорт коди) ёзувини кўрганлигини даъво қилган.
Натижада самолёт парвоз қилмай, терминалга қайтди. «Шубҳали» йўловчи ва унинг уч нафар ҳамроҳи сўроқ қилинди ва айблов эълон қилинмай, қўйиб юборилди. «Унинг мобил телефонидан ‘динамит’ сўзи мавжуд хабар топилмади», дея таъкидлаган Грин.
Париждаги терактлардан сўнг АҚШда, хусусан, Нью-Йорк, Бостон, Майами, Чикаго ва Лос-Анжелесда хавфсизлик чоралари кучайтирилган. Гарчи аниқ хавф-хатар бўлмаса-да, расмийлар америкаликларни ҳушёрликни бой бермасликка чақирмоқда.
Изоҳ (0)