Семейда (Қозоғистон) уйсиз аёл бокс бўйича мураббийни ўлгунча калтаклади. Эркакнинг ўлими сабабларини аниқлаш бир йил давом этди. Бу ҳақда «Tengrinews» хабар бермоқда.
Ҳодиса ўтган йил ноябрида содир бўлган. Яқинларининг айтишича, ўша пайтда ичкиликбозликка берилган мураббий вокзалда уйсиз 34 ёшли аёл билан танишади. Иссиқлик қувури олдига бориб, биргаликда спиртли ичимлик ичиш жараёнида аёл мураббийдан қарз сўрайди, рад жавобини эшитгач, ердан калтак олиб, чаккасига туширади. Эркак ҳушидан кетади, аёл эса унинг чўнтагини кавлаб, беш минг тенге топади.
Эртасига аёл мураббийни иссиқлик қувури ёнидан топиб, яна ичишни таклиф этади. Бу гал ҳам уларнинг ўртасида жанжал кўтарилади. Тергов маълумотларига кўра, аёл қувур устига чиқиб, бир неча бор мураббийнинг кўкрагига сакраган. У ҳушидан кетганидан сўнг икки нафар ўткинчи ёрдамида яқин орадаги кўпқаватли уйга ташиб келади. Маҳаллий аҳоли тиббий ёрдам ва полицияни чақиради. Шифокорлар эркакни сақлаб қололмади, у бир неча соатдан сўнг ҳаётдан кўз юмади.
Суд давомида аёл айбини тан олмади, мураббийни калтакланган ҳолда топганини маълум қилди. Тергов хулосасини ҳалок бўлган шахснинг қизи ҳам қабул қилмади, унинг айтишича, отасига ўн киши ҳам бас келолмаган. Натижада суд ишни қайта терговга жўнатди, бироқ бир йил давомида тергов хулосаси ўзгармади. Бу орада гумонланувчи кўрсатмаларини ўзгартирди ва айбини тан олди. Аёл олти йиллик қамоқ жазосига ҳукм қилинди.
Изоҳ (0)