Semeyda (Qozog‘iston) uysiz ayol boks bo‘yicha murabbiyni o‘lguncha kaltakladi. Erkakning o‘limi sabablarini aniqlash bir yil davom etdi. Bu haqda “Tengrinews” xabar bermoqda.
Hodisa o‘tgan yil noyabrida sodir bo‘lgan. Yaqinlarining aytishicha, o‘sha paytda ichkilikbozlikka berilgan murabbiy vokzalda uysiz 34 yoshli ayol bilan tanishadi. Issiqlik quvuri oldiga borib, birgalikda spirtli ichimlik ichish jarayonida ayol murabbiydan qarz so‘raydi, rad javobini eshitgach, yerdan kaltak olib, chakkasiga tushiradi. Erkak hushidan ketadi, ayol esa uning cho‘ntagini kavlab, besh ming tenge topadi.
Ertasiga ayol murabbiyni issiqlik quvuri yonidan topib, yana ichishni taklif etadi. Bu gal ham ularning o‘rtasida janjal ko‘tariladi. Tergov ma’lumotlariga ko‘ra, ayol quvur ustiga chiqib, bir necha bor murabbiyning ko‘kragiga sakragan. U hushidan ketganidan so‘ng ikki nafar o‘tkinchi yordamida yaqin oradagi ko‘pqavatli uyga tashib keladi. Mahalliy aholi tibbiy yordam va politsiyani chaqiradi. Shifokorlar erkakni saqlab qololmadi, u bir necha soatdan so‘ng hayotdan ko‘z yumadi.
Sud davomida ayol aybini tan olmadi, murabbiyni kaltaklangan holda topganini ma’lum qildi. Tergov xulosasini halok bo‘lgan shaxsning qizi ham qabul qilmadi, uning aytishicha, otasiga o‘n kishi ham bas kelolmagan. Natijada sud ishni qayta tergovga jo‘natdi, biroq bir yil davomida tergov xulosasi o‘zgarmadi. Bu orada gumonlanuvchi ko‘rsatmalarini o‘zgartirdi va aybini tan oldi. Ayol olti yillik qamoq jazosiga hukm qilindi.
Izoh (0)