Россиянинг Томск шаҳрида 22 ёшли йигит пиццага уйланди. «Новости в Томске» интернет-порталига хабар беришларича, бундай «келин-куёв»нинг ФҲДЁ бўлимига киришига рухсат берилмаган, бироқ кафеда барибир тўй маросими бўлиб ўтган.
Томсклик йигит ёлғизликдан жуда чарчагани ва доимий умр йўлдоши йўқлиги сабаб, пиццага уйланишга қарор қилган.
«Қарасам, дўстларимнинг ярми оилавий ҳаётдан нолиса, иккинчи ярим айнан оилавий ҳаётнинг йўқлигидан норози. Инсонлар ўртасидаги муҳаббат мураккаб ва уни олдиндан билиб бўлмайди, овқатга муҳаббат эса — абадий. Пицца муҳаббатни рад этмайди ва бевафолик қилмайди, мен эса ҳақиқатан ҳам уни жуда севаман», — деди у.
Ёш йигит ва унинг суюклисини норасмий никоҳ ришталари билан пиццерия боғлаб қўйди. Никоҳ ҳақидаги гувоҳномани ФҲДЁ ходимлари ўрнига пиццерия ошпазлари ва менежерлари топширди. Куёв қўлидаги «қайлиғи» билан фотосессия уюштирди.
2015 йилнинг июль ойида АҚШнинг Сан-Франциско шаҳрида истиқомат қилувчи ёзувчи Дэвид Сикорски дўстларидан «қасос олиш» учун шаурмага уйлангани ҳақида хабар берилган эди.
Изоҳ (0)