Парижда 13 ноябрь куни уюштирилган террочилик ҳужумлари ташкилотчиси 27 ёшли суриялик радикал Абдулҳамид Абауд бўлган, дея хабар бермоқда «Газета.ru» Франциянинг RTL радиосига таяниб.
Тергов маълумотларига кўра, Абауд Франция пойтахтидаги ҳужум ва портлашларга ҳомийлик қилган ва уларни ташкиллаштирган. Уни «Суриядаги ИШИДнинг энг фаол жангариларидан бири» деб аташмоқда.
Абауднинг исми Бельгияда терактлар тайёрлаш ҳақидаги тергов доирасида аввал ҳам тилга олинган. Бундан ташқари, у йил бошида Грецияда таъқиб этилган террорчилар орасида бўлган. Баъзи маълумотларга кўра, у ҳибсга олинган.
Эслатиб ўтамиз, Париждаги терактлар кетма-кетлиги 13 ноябрь оқшомида юз берди. Террорчилар «Стад де Франс» стадиони яқинида бомба портлатди, бир қатор ресторанлар ва концерт залидаги томошабинларга қарата ўт очди. Сўнгги маълумотларга кўра, терактлар оқибатида 129 киши ҳалок бўлган.
- Воқеа: Париждаги терактлар
Изоҳ (0)