Ўзбекистон «Бўйдоқлар куни»да Alibaba билан Webmoney орқали ҳисоб-китоб қилиш бўйича биринчи бўлди

Webmoney тизими Хитойда 11 ноябрь куни нишонланадиган «Бўйдоқлар куни» муносабати билан ташкил этилган савдолар чоғида AliExpress’да ҳисоб-китоб қилиш учун WMZ-ҳамёндан фойдаланиш бўйича МДҲ ва Болтиқбўйи мамлакатлари статистикасини юритди ва ҳар бир мамлакатнинг ўртача харид чекини ҳисоблаб чиқарди. Бу ҳақда «SearchEngines.ru» хабар бермоқда.

Маълумотларга кўра, Webmoney Transfer халқаро ҳисоб-китоб тизими фаолият олиб борадиган барча мамлакатлар бўйича 11 ноябрги ўртача харид чеки ўтган йилга нисбатан 5 фоизга, умумий айланма эса 115 фоизга ошди. Айни вақтда, ҳар бир мамлакат бўйича кўрсаткичлар сезиларли фарқ қилади.

Хусусан, Россияда ўртача харид қиймати 10,6 долларни ташкил этди. Рейтингда Ўзбекистон, Эстония ва Туркманистон етакчи бўлди — мазкур мамлакатларнинг ўртача чеки мос равишда 18, 17,5 ва 17 долларни ташкил этган. Рейтингни Қирғизистон (10,5 доллар), Молдова (9,5 доллар) ва Арманистон (8,9 доллар) якунлаган.

Аввалроқ Alibaba «Бўйдоқлар куни»нинг дастлабки 10 соатида 8 млрд доллар ишлаб топгани ҳақида хабар берилган эди.