Қизиқчи Шукрулло Исроилов «Даракчи» газетасига берган интервьюсида келини Ҳалима Ибрагимованинг жияни эканлиги ҳақидаги миш-мишларни рад этди.
«Йўғ-эй, ундай эмас. Йўқ, Ҳалимага қариндошлиги йўқ», — деди Шукрулло Исроилов.
Қизиқчининг айтишича, келини зиёли оиланинг фарзанди, ота-онаси ҳам жуда бамаъни одамлар. «Яхши оила, фарзандлари оқила, дейишди. Муҳими, тарбияси чиройли», — дейди санъаткор.
«Санъаткормиз, кўп тўйларда қатнашамиз, кечагина тўй қилиб, бугун ажрашаётганларни кўриб, хафа бўлиб кетаман. Ҳаммаси тўйдан аввал бир-бирини суриштирмагани, билмагани, майда гапни кўпайтириш оқибатида келиб чиқади. Ўзим қийинчилик кўриб улғайганим учун бундай нарсаларга жим қараб туролмайман, ҳар нарсанинг уволи бор ахир!», — дейди қизиқчи.
Шукрулло Исроиловнинг айтишича, келин — бировнинг фарзанди, уни авайлаб-асраш керак. «Аммо бировнинг қизи ҳам шу хонадонни ўз уйим деб билиб, шароитига мослашиши лозим. Ёшларимизнинг кўпи буни тушунмайди», — дея қўшима қилди қизиқчи.
Эслатиб ўтамиз, Шукрулло Исроилов 20 октябрь куни тўнғич ўғли Ҳумоюнни уйлантиргани ҳақида хабар берилган эди. Маълумот учун, Шукрулло Исроиловнинг икки ўғил ва бир қиз фарзанди бор.