«Юлдуз жанглари» фазовий сагасининг янги қисмини премьерадан аввал томоша қилишга муваффақ бўлган техаслик 32 ёшли Дэниэл Флитвуд 10 ноябрга ўтар кечаси — фильмни кўриб бўлганидан тўрт кун ўтиб вафот этди. Бу ҳақда Look At Me хабар бермоқда.
Аввалроқ Disney компанияси, режиссёр Жей Жей Абрамс ва Bad Robot компанияси «Юлдуз жанглари»нинг саратонга чалинган ишқибози учун янги «Юлдузлар жанги: кучнинг уйғониши» фильмининг хайрия намойишини ўтказгани ҳақида хабар берилган эди.
Шу йилнинг июлида Дэниэл Флитвудга бириктирувчи тўқима саратонининг оғир ва камёб шакли бўлган «дуксимон ҳужайралар саркомаси» ташхиси қўйилган. Шифокорлар Флитвуднинг икки ойча умри қолганини маълум қилганди.
Флитвуднинг қариндошлари «Юлдуз жанглари: Кучнинг уйғониши» фильми ижодкорларининг эътиборини жалб қилиш учун Twitter’да #ForceforDaniel кампаниясини ташкил қилди. Бироз вақт ўтиб, унга актёр Марк Хеммил қўшилди (у фильмда Люк Скаюокер ролини ижро этган).
Шундан сўнг Флитвудга Абрамс қўнғироқ қилиб, эртаси куни унинг уйида фильм қўйиб берилишини айтди. Кейинроқ Флитвуднинг қариндошлари намойиш муваффақиятли кечганини маълум қилди.
Изоҳ (0)