Тошкент марказида янги Nexia’нинг тўрт ғилдираги ечиб кетилди
Тошкент шаҳрининг Лабзак даҳасида ҳуқуқбузарлар Chevrolet Nexia 2 автомобилининг тўртала ғилдирагини ечиб кетди. Бу ҳақда 11 ноябрь, чоршанба куни Facebook’даги «Водители Ташкента» гуруҳида хабар қолдирилган.
«Тўртта янги ғилдирак ўрнига иккита домкрат қолдириб кетишибди», — деб ёзади ғилдираксиз қолган янги автомобиль суратини гуруҳга жойлаган фойдаланувчи.
Аксарият фойдаланувчилар домкрат қолганига хурсанд бўлса арзийди, қабилида фикр билдирган бўлса, фойдаланувчиларнинг бири: «Кимдир бу ўғриларни қўрқитиб юборган, ўзидан ўзи улар домкратни қолдириб кетмайди», — деб ёзган.
«Автомобиль эгасига ачинаман. Қандай аҳволга тушганини ҳам ҳис қиляпман. Бир йил аввал менинг машинамни ҳам ғилдиракларини ечиб кетишганди», — деб ёзади бошқа бир фойдаланувчи.
«Водители Ташкента» гуруҳининг бир қатор аъзолари домкратларда ўғриларнинг бармоқ излари қолган бўлиши мумкинлиги ҳақида фикр билдирган, бошқа бир фойдаланувчилар эса ғилдиракни ечганлар қўлқопда ишлаган бўлиши мумкин, деб ёзган.
