Volkswagen концернининг бир неча муҳандислари ички текширув давомида дизель двигателларида зарарли ташланмалар кўрсаткичини пасайтириш билан боғлиқ сохтакорликларни тан олди. Бу ҳақда Meduza хабар бермоқда.
Мазкур ходимларнинг айтишича, концерннинг собиқ раҳбари Мартин Винтеркорн томонидан белгилаб берилган мақсадларга эришиш учун бундай фирибгарликларга қўл уришга мажбур бўлишган.
2012 йил мартида Винтеркорн Volkswagen 2015 йилга келиб CО2 ташланмаларини 30 фоизга пасайтиришини эълон қилган. Муҳандислар эса раҳбарга бу мақсадга эришиш мушкул эканини айтишга чўчиган. Улар бунинг ўрнига ёқилғи сарфи ва CО2 ташланмалари кўрсаткичларини сохталаштиришни бошлаган. Масалан, ташланмаларни камайтириш учун шиналардаги босим кучайтирилган, ёқилғи сарфини камайтириш учун эса мотор мойига дизель қўшилган.
Эслатиб ўтамиз, олдинроқ Volkswagen АҚШ бўлинмаси раҳбари Майкл Хорн экологик тестлар билан боғлиқ можароларда раҳбарият айбини инкор этиб, бутун масъулиятни компания муҳандисларига юклаган эди.
Изоҳ (0)