Тошкент шаҳридаги Чилонзор кўчасининг «Чилонзор» савдо маркази олдидаги серқатнов қисмида автомобилидан тушиб, қария аёлнинг йўлдан ўтишига ёрдам берган ҳайдовчи ижтимоий тармоқларда олқишланди. Вазият акс этган видеоёзув Facebook’даги «Водители Ташкента» гуруҳида эълон қилинган.
«Ҳозиргина бир ёшгина йигит йўлда ҳаракатни тўхтатиб, бувижонни йўлдан ўтказиб қўйди! Сизга катта раҳмат, йигитча! Гап бўлиши мумкин эмас! Фақат хурсандман!», — деб ёзади видеони гуруҳга жойлаган фойдаланувчи. Аксарият фойдаланувчилар Lacetti ҳайдовчисининг бу ҳаракатлари ҳақида фақат илиқ фикрлар билдирган.
Баъзи фойдаланувчилар Чилонзор кўчасидаги йўлнинг бу қисмида ҳаракат «шунчаки қўрқинчли» эканини, бу ерда йўлни белгиланмаган жойдан «фақат камикадзелар кесиб ўтиши»ни алоҳида қайд этган.
Айни вақтда, бир гуруҳ фойдаланувчилар ҳайдовчилик маданияти ёмонлашиб кетганидан нолиган. «Даҳшат, қандай аҳволга тушиб қолдик ахир! Бир бувини йўлдан ўтказиб қўйиш — катта бир қаҳрамонликка тенглаштирилса-я! Авваллари бу оддий, ҳар ким қилиши керак бўлган ҳолат эди», — деб ёзади фойдаланувчилардан бири.
Изоҳ (0)