«Поедем, поедим!» кўрсатувининг навбатдаги сони Ўзбекистонда тасвирга олинади

9 ноябрь куни Ўзбекистонга Россиянинг «НТВ» федерал телеканалида намойиш этиладиган «Поедем, поедим!» («Борамиз, тановвул қиламиз») машҳур пазандалик кўрсатувининг тасвирга олиш гуруҳи етиб келди. Гуруҳни таниқли бошловчи, ошпазлик санъатининг билимдони Жон Уоррен бошқариб боради.  Бу ҳақда «Жаҳон» ахборот агентлиги хабар беради.

Мазкур кўрсатувнинг Ўзбекистонга бағишланган навбатдаги сонини Самарқанд ва Бухоро шаҳарларида тасвирга олиш режалаштирилган. Ижодкорларнинг сўзларига кўра, «Поедем, поедим!» кўрсатуви орқали томошабинлар нафақат турли ўзбек миллий таомларини тайёрлашни ўрганиши, балки Шарқнинг икки дурдона шаҳарлари мисолида бой тарихий воқеалар, ўзбек халқининг ноёб урф-одатлари ва анъаналари билан яқиндан танишиши мумкин бўлади.

Россия тасвирга олиш гуруҳининг Ўзбекистонга сафари «Мега-инфо-тур» Давлат дастури доирасида «Ўзбектуризм» миллий компанияси кўмагида амалга оширилмоқда. Уни ўтказишдан мақсад дунё ҳамжамиятини республиканинг жозибали тарихий-маданий объектлари ва турли сайёҳлик имкониятлари билан таништиришдан иборатдир.

Тасвирга олиш ишлари 13 ноябрга қадар давом этади.