Ўзбекистон — КХДР учрашуви чипталари нархи ўйинга уч кун қолганида белгиланганидан қимматлашди

Футбол бўйича 2018 йилги жаҳон чемпионати ва 2019 йилги Осиё Кубоги саралаш босқичи доирасида 12 ноябрь, пайшанба куни Тошкентдаги «Пахтакор» стадионида ўтказиладиган Ўзбекистон ва КХДР миллий терма жамоалари ўртасидаги учрашувга уч кун қолганида, марказий секторлар учун чипталар стадион кассаларида қолмади. Бу ҳақда ЎзМТРК «Спорт» телеканалининг «Футбол шарҳи» кўрсатувида хабар берилди, кўрсатувдан лавҳа «Championat.asia» сайтида эълон қилинган.

Эслатиб ўтамиз, Ўзбекистон — КХДР учрашуви чипталари 6 ноябрь куни соат 14:00 дан сотувга чиқарилгани, CIP тоифали чипталар нархи 30 минг, қолган барча секторлар учун чипталар нархи 15 минг сўм этиб белгилангани ҳақида аввалроқ хабар берилган эди.

Кўрсатувда қайд этилишича, чипталар савдосига Ўзбекистон Футбол Федерациясининг Терма жамоалар маркази эмас, балки ўйин ўтказилаётган «Пахтакор» стадиони раҳбарияти масъул бўлган. Кўрсатувга интервью берган харидорлардан бири стадион кўчма кассаларида марказий секторлар учун чипта қолмагани, олиб-сотарлар эса марказий сектор чипталарини белгиланганидан қиммат нархда таклиф қилаётгани ҳақида айтиб ўтган.

https://www.youtube.com/watch?v=Y_Gs6dt3CFA

«Футбол шарҳи» кўрсатуви ижодкорлари яширин камера орқали чипта олиб-сотарлари фаолиятини тасвирга олишга ҳаракат қилган. Маълум бўлишича, улар CIP секторга ёндош ва унга қарама-қарши томондаги марказий секторларнинг аслида 15 минг сўмлик чипталарни камида 20 минг сўмдан таклиф қилмоқда, баъзи ҳолатларда чипта нархи 30 минг сўмгача бормоқда.

Қайд этишларича, ўйин куни аслида 15 минг сўмлик чипталар нархи янада қимматлашиши мумкин — шу куни миллий терма жамоа иштирокидаги ўйинни томоша қилиш учун вилоятлардан ҳам футбол мухлислари стадионга ташриф буюради ва аксарияти чиптани бевосита ўйин олдидан, белгиланган нархидан қимматга сотиб олишга мажбур бўлади.

Эслатиб ўтамиз, Ўзбекистон ва КХДР миллий терма жамоалари ўртасидаги ўйин 12 ноябрь куни соат 18:00 да бошланади. Ўйинни Алиризо Фағони бошчилигидаги эронлик ҳакамлар бригадаси бошқариб боради. Айни вақтда «H» саралаш гуруҳида КХДР терма жамоаси бешта ўйинда 13 очко тўплаган ҳолда пешқадам бўлиб турибди. Ўзбекистон эса гуруҳдаги рақибларидан бир ўйин кам ўтказган ҳолда 9 очко билан иккинчи ўринни эгаллаб турибди.