Франциянинг ҳафталик газетаси — Charlie Hebdo’нинг бош муҳаррири Жерар Биар таҳқирлаш тушунчаси нашр учун мавжуд эмаслигини айтди, деб ёзади RFI. Бу билан у Россия президенти матбуот котиби Дмитрий Песковнинг гапига жавоб қайтарди.
Унинг таъкидлашича, Россия самолёти қулашига боғлиқ тасвирлар фожиа қурбонлари ёки фактлари устидан кулиш мақсадига эга эмас. «Бу расмларда карикатура персонажлари йўқ. Биз шунчаки ҳодисага изоҳ бериб, унга нисбатан нуқтаи назаримизни кўрсатяпмиз», — деди Биар.
Эслатиб ўтамиз, Россиянинг «Когалимавиа» компаниясига тегишли A321 йўловчи самолётининг Мисрдаги ҳалокати француз сатирик газетаси Charlie Hebdo карикатурасига мавзу сифатида хизмат қилди. Ўзининг провокацион мақолалари билан танилган нашрнинг янги сонида 224 кишини ҳаётдан олиб кетган фожиа мавзуси бирданига икки суратда акс эттирилган.
Кремлдагилар карикатураларнинг чоп қилинишини «таҳқирлаш» деб атади. «Бунинг на демократияга, на ўз фикрини эркин ифода қилишга, ҳеч нарсага боғлиқлиги йўқ — бу таҳқирлаш», — дея таъкидлади Россия президенти матбуот котиби Дмитрий Песков.
Аввалроқ Франциянинг Charlie Hebdo газетасида Россиянинг A321 лайнери ҳалокати мавзусида карикатуралар чоп этилгач, Россия Twitter’ида #ЯНеШарли («Мен Шарли эмасман») ҳэштеги топга чиққани хабар берилган эди.
Изоҳ (0)