Жанубий Суданда ҳалокатга учраган самолёт 1971 йилда Тошкентда ишлаб чиқарилган

Жанубий Суданда ҳалокатга учраган Ан-12 юк самолёти В.П. Чкалов номли Тошкент авиация ишлаб чиқариш бирлашмаси (ҳозирги Тошкент механика заводи)да тайёрланган, дея хабар бермоқда «ТАСС».

Самолёт 1971 йилдан эксплуатация қилина бошлаган. 1993 йилгача Россиянинг Магадан фуқаролик авиацияси бошқармаси таркибида бўлган. Шундан сўнг «Магадан Авиа Лизинг» авиакомпанияси мулкига ўтган, 1996 йилда у Сан-Томе ва Принсипида рўйхатдан ўтган British Gulf International авиакомпаниясига сотиб юборилган, 2007—2014 йилларда Арманистоннинг South Airlines ва Taron Avia ташувчилари паркида турган. 2014 йилда эса Тожикистоннинг Asia Airways компаниясига ўтган, сўнг Жанубий Суданнинг Allied Services Limited компанияси паркига келиб тушган.

Жанубий Суданда юз берган авиаҳалокат оқибатида 41 киши ҳалок бўлди. Самолёт бортида беш нафар россиялик бўлган, уларнинг барчаси экипаж аъзолари эди.

Аввалроқ Россиянинг Угандадаги элчихонаси Жанубий Суданда юз берган авиаҳалокат қурбонлари орасида россияликлар борлигини тасдиқламагани хабар берилди.