Бразилия парламенти қуйи палатаси раиси Эдуарду Куньянинг матбуот анжумани сиёсатчи аралашиб қолган коррупцияли жанжалга нисбатан норозилик сифатида унинг устидан ўнлаб сохта доллар сочиб юборилганидан сўнг тўхтатилди. Бу ҳақда «ТАСС» хабар бермоқда.
26 ёшли Тьягу Ферейра полиция уни залдан олиб чиқиб кетгунча «Кунья, сизга Швейцариядан посилка келди», дея қичқиришга улгурган. 100 долларлик купюраларда Бенжамин Франклин портрети ўрнига парламент қуйи палатаси раисининг сурати жойлаштирилганди.
Сентябрь ойи охирларида Швейцария прокуратураси Кунья ва унинг оила аъзолари номига очилган бир неча банк ҳисоб рақамларини музлатиб қўйди. Ҳуқуқ-тартибот идоралари мазкур ҳисоб рақамлардаги маблағ коррупция ёрдамида қўлга киритилганини истисно этмаган.
Куньянинг ўзи хорижда молиявий манбалари борлигини инкор этиб, сиёсий сабабларга кўра таъқиб қурбони бўлганини таъкидламоқда. Қуйи палата раиси Petrobras давлат нефтгаз корпорацияси билан боғлиқ коррупцияли можарода ҳам гумонланувчилардан бири ҳисобланади.
Бразилия парламентининг ахлоқ қўмитаси мухолифатдаги депутатлардан келиб тушган Куньяни ваколатларидан маҳрум этиш бўйича талабномаларни кўриб чиқишни бошлади.
Изоҳ (0)