Мадриднинг «Реал» футбол клуби ҳужумчиси Карим Бензема Москванинг «Динамо» клуби собиқ ярим ҳимоячиси Матье Вальбуэнага нисбатан товламачилик иши бўйича 5 ноябрь, пайшанба куни судда кўрсатма берди. Бу ҳақда «ТАСС» хабар бермоқда.
Товламачилар айни вақтда Франциянинг «Лион» клубида тўп сураётган Вальбуэнадан, унинг шахсий ҳаётига доир видеоёзувни оммага эътиборига ҳавола қилиш таҳдиди билан, пул талаб қилган. Полициянинг аниқлашича, пул тўлови бўйича телефон суҳбатлари вақтида Карим Бенземанинг ҳам исми тилга олинган ва шу сабаб у 4 ноябрь, чоршанба куни ҳибсга олиниб, тунни полиция бўлинмасида ўтказган.
BFM телеканали хабарига кўра, тергов икки футболчи ўртасида обрўсизлантирувчи видеоёзув юзасидан суҳбат бўлиб ўтганини аниқлаган. Бироқ, бу ҳолатда Бензема товламачиларнинг воситачиси сифатида қатнашганми ёки Вальбуэна билан бирга мазкур вазиятни қоралаганми — ҳозирча номаълум.
Бир қатор ОАВлар маълумотларига кўра, обрўсизлантирувчи видеоёзув дастлаб Бенземанинг мобил телефонида бўлган, бу телефон эса франциялик футболчиларга хизмат кўрсатувчи унча катта бўлмаган фирмалардан бирининг вакили қўлига тушиб қолган. Катта эҳтимол билан, айнан шу одам Вальбуэнага нисбатан товламачилик ҳаракатини бошлаган.
Ҳозирги вақтда мазкур иш бўйича уч киши ҳибсда сақланмоқда, уларнинг икки нафари Франциядаги жиноятчилик даражаси энг юқори бўлган шаҳарлардан бири — Марсел фуқаролари ҳисобланади. Аввалроқ полициячилар франциялик бошқа бир футболчи — Жибрил Сиссени мазкур иш бўйича сўроқ қилган, бироқ у кўрсатма бериб бўлганидан сўнг, қўйиб юборилган эди.
Вальбуэна фаолиятининг аксарият қисмини «Марсел»да ўтказган. Франция терма жамоаси ярим ҳимоячиси 2014/2015 йилги мавсумда Москванинг «Динамо» жамоаси шарафини ҳимоя қилди, шундан сўнг, «Лион» билан узоқ муддатли шартнома имзолаб, қадрдон чемпионатига қайтишга қарор қилди.
Изоҳ (0)