АҚШ давлат департаменти Миср ҳукуматига умумий қиймати қарийб 5 миллиард доллар бўлган “ер-ҳаво” ракета тизимларини сотишга розилик берди. Бу ҳақда Пентагонга таяниб Al-Jazeera маълум қилди.
Хабар қилинишича, Қоҳира битим доирасида NASAMS ҳаво мудофаа тизимлари, жумладан, тўртта АN/МPQ-64 Sentinel радар комплекси, юзлаб ракеталар ва учириш қурилмаларини олади.
Бундан ташқари, АҚШ ҳукуматининг 26 нафар ходими ва 34 нафар пудратчи битим доирасида Мисрга юборилади. Улар мамлакат ҳарбийларига муҳандислик, техник ва логистика ёрдамини кўрсатади. Вашингтон мазкур келишувни ўзининг Яқин Шарқдаги стратегик манфаатлари ва НАТОга кирмаган асосий иттифоқчиларидан бири Миср хавфсизлигини мустаҳкамлаш зарурати билан изоҳлаган.
NASAMS АҚШ ва Норвегия ҳамкорлигида ишлаб чиқилган ҳаво мудофаа тизими бўлиб, душман самолётлари, дронлар ва қанотли ракеталарга қарши қўлланади. Миср эса АҚШнинг минтақадаги энг йирик иттифоқчиларидан бири бўлиб, Исроил билан дипломатик муносабатлар ўрнатилган 1980 йилдан буён Вашингтондан катта миқдорда ҳарбий ёрдам олади.
Бироқ таъкидлаш жоиз, Қоҳира сўнгги йилларда Пекин билан ҳам алоқаларини мустаҳкамламоқда. Жорий йилнинг апрель—май ойларида икки давлат Eagles of Civilization 2025 қўшма машғулотларини ўтказди.
Изоҳ (0)