Россия давлат атом энергетика компанияси Росатом Туркия жанубида қурилаётган Аккую АЭС ишчиларига маошлар ўз вақтида тўланмаётганини ташқи сиёсий омиллар билан изоҳлади.
Компания матбуот хизмати лойиҳа учун ажратилган маблағларнинг катта қисмини учинчи томон блоклаганини билдирди. Аммо гап айнан қайси ўйинчи ҳақида кетаётгани айтилмади.
“Биз ҳаммамиз ривожланган рус ядро лойиҳаларини издан чиқаришга уринаётган душман мамлакатларнинг шубҳали усуллари тузоғига тушяпмиз”, дейилади компания хабарида.
Компания Аккую АЭСни қуришда меҳнат қилаётган ходимлар бир неча ойдан бери маош берилмаётганидан норози бўлиб, иш ташлаш ўтказганидан сўнг масалага изоҳ беришга мажбур бўлди. Тармоқларда тарқалган видеоларда ишчиларнинг қурилиш техникаларини тўсиб қўйгани ва жанжалли ҳолатлар акс этган.
Росатом муаммоларни муҳокама қилиш учун пудратчилар билан учрашув ўтказилишини маълум қилди. Маҳаллий шўба корхона Аккую Нуcлеар эса ишчилар билан музокаралар давом этаётганини тасдиқлади.
Туркларнинг дастлабки атом электр станцияси
Аккую АЭС Туркияда қурилаётган илк атом электр станцияси бўлиб, унда Россиянинг VVER-1200 реакторларидан тўртта ўрнатилади. Лойиҳа ишга тушгач, у мамлакатда электр энергиясига бўлган эҳтиёжнинг 10 фоизини таъминлаши айтилади. Росатом асосий инвестор сифатида жалб қилинган. Геосиёсий танглик ва Россияга нисбатан киритилган санкцияларга қарамай, лойиҳа давом этмоқда.
Изоҳ (0)