Бразилиянинг Рио-де-Жанейро шаҳрида 2016 йили бўлиб ўтадиган ёзги Олимпиада ўйинларига йўлланма олган ўзбекистонлик спортчилар сони яна биттага кўпайди. Бу ҳақда Ўзбекистон Миллий олимпия қўмитаси матбуот хизмати хабар бермоқда.
Қатар пойтахти Доҳа шаҳрида давом этаётган Жаҳон Гран-Присининг навбатдаги босқичида ўзбекистонлик Раънохон Аманова 200 метр масофага комплекс усулда сузиш бўйича мусобақада 2:13,08 сония натижа қайд этиб, Рио—2016 лицензиясини қўлга киритди.
МОҚ матбуот хизматининг қайд этишича, Жаҳон Гран-Присида қатнашаётган яна бир ўзбекистонлик — Владислав Мустафин 3 ноябрь, сешанба куни 100 метр масофага брасс усулда сузиш мусобақасида стартга чиқади.
Маълумот учун, Жаҳон Гран-Присининг навбатдаги босқичи 6—7 ноябрь кунлари БААнинг Дубай шаҳрида ўтказилади. Ўзбекистон сузиш федерациясидан маълум қилишларича, Доҳа ва Дубай Гран-Приларига жами 9 нафар ўзбекистонлик спортчи йўл олган.
Қайд этиш жоиз, Раънохон Аманова 2012 йили Лондон шаҳрида бўлиб ўтган ХХХ ёзги Олимпиада ўйинларида ҳам Ўзбекистон шарафини ҳимоя қилган.
Изоҳ (0)