Шарм-аш-Шайх — Санкт-Петербург рейси самолёти авиаҳалокатида қурбон бўлган йўловчиларнинг илк жасадлари Россия Фавқулодда вазиятлар вазирлиги самолёти билан Санкт-Петербургнинг «Пулково» аэрпортига олиб келинди, дея хабар бермоқда «ТАСС».
2 ноябрь, душанба куни тонгда жасадлар шахсини уларнинг қариндошлари ёрдамида аниқлаш жараёни бошланган. Бундан ташқари, «Ингосстрах» суғурта компанияси ҳалок бўлганларнинг қариндошларидан аризаларни қабул қилишни бошлайди.
Бундан ташқари, Санкт-Петербург губернатори Георгий Полтавченко маълум қилганидек, 2 ноябрь, душанба куни қурбонларнинг қариндошларига компенсациялар тўлаш ҳақидаги ҳужжатлар имзоланади. Компенсация пуллари қайси вилоят, қайси мамлакатда истиқомат қилганидан қатъий назар, самолётда бўлган барча қурбонлар учун тўланади.
Эслатиб ўтамиз, 31 октябрь, шанба куни Россиянинг Metrojet («Когалимавиа») авиакомпаниясига тегишли, Шарм-аш-Шайхдан Санкт-Петербургга учаётган Airbus A321 лайнери Мисрнинг Шимолий Синай вилояти Эль-Ариш шаҳри яқинида қулади. Самолётда жами 224 киши — 217 нафар йўловчи ва 7 нафар экипаж аъзоси бўлган.
Миср ҳукумати баёнотига кўра, самолёт ҳалокати оқибатида борт ичида бўлганларнинг ҳеч бири омон қолмаган. Самолётнинг аксарият йўловчилари Россия фуқаролари эди. Сўнгги маълумотларга кўра, Мисрда қулаган самолёт ичида 132 нафар петербурглик, Ленинград вилоятида истиқомат қилувчи 46 киши, Россиянинг бошқа ҳудудларида яшовчи 34 фуқаро, шунингдек, тўрт нафар украиналик ва бир беларуслик бўлган.
Изоҳ (0)