Россия телеканаллари тирик одамларнинг суратларини Мисрдаги авиаҳалокатда қурбон бўлган сайёҳларнинг сўнгги суратлари сифатида кўрсатди

Россия телеканаллари Мисрда дам олаётган россиялик сайёҳларнинг суратларини хатолик сабаб Синай яриморолида қулаган A321 самолётида ҳалок бўлганларнинг сўнгги кадрлари сифатида кўрсатди. Бу ҳақда «Газета.ru» хабар бермоқда.

Бу ҳақда телеканаллар орқали намойиш этилган фотосуратлар муаллифи Юлия Костяница Instagram’даги ўз саҳифасида маълум қилди, у ўз хабарига эфирлардан олинган скриншотларни ҳам илова қилган.

«Биз тирикмиз! Бу сурат олинганига бир ҳафта бўлди!», — деб ёзади у ўз саҳифасида. Аёлнинг сўзларига кўра, тирик сайёҳларнинг суратлари Россиянинг «Биринчи канали», «Россия 1», «НТВ» телеканаллари эфирида, шунингдек, бошқа бир қатор ОАВларда ҳалок бўлганларнинг сўнгги лаҳзалари сифатида кўрсатилган.

Костяницанинг қайд этишича, у бу ҳақда барча телеканалларга мурожаат қилган, бироқ уларнинг ҳеч бири бунга жавоб бермаган.

Эслатиб ўтамиз, 31 октябрь, шанба куни Мисрда Metrojet («Когалимавиа») авиакомпаниясининг Шарм-аш-Шайхдан Санкт-Петербургга учаётган Airbus A321 лайнери ҳалокатга учради. Самолёт бортида бўлган 224 кишининг барчаси ҳалок бўлди. Авиаҳалокатга техник носозликлар сабаб бўлган бўлиши мумкин.