Майамида АҚШ президентлигига номзод миллиардер Дональд Трампнинг нутқи вақтида унинг тарафдорлари лотин америкалик талабалар билан низолашди. Бу ҳақда Business Insider хабар бермоқда.
Трамп нутқ ўқиаётган вақтда Флорида халқаро университетининг саккиз нафар талабаси «тенглик» деб ёзилган лавҳаларни кўтариб чиққан, миллиардернинг тарафдорлари эса уларга ташланиб, лавҳаларни тортиб олган ва йиртиб ташлаган.
Трампнинг тарафдорларидан бири лавҳа кўтарган намойишчи Ариэл Рохасга ташланиб, уни чиқиш жойига судрай бошлаган, ярим йўлда уни ерга йиқитиб, тепган.
Трампнинг сайловолди штаби мазкур ҳолатга миллиардернинг хавфсизлик хизмати ходимлари ҳам, унинг қўл остидаги бошқа одамлар ҳам алоқадор эмаслиги ҳақида баёнот бериб чиқди.
Шунга қарамай, The Hill нашрининг хабар беришича, Трампнинг қўриқчилари бошқа бир гуруҳ намойишчиларга нисбатан куч ишлатган. Миллиардер минбардан туриб: «Уларни кўчага чиқариб ташлашингиз мумкин, фақат зарар етказманг», — деган.
Учрашувга йиғилганларнинг барчасини Трамп сабр косаси тўлаётгани ҳақида огоҳлантирган. «Келаси сафар мен янада қатъийроқ бўламан, шундан сўнг залдан ҳайдаб соламан», — дея қўшимча қилди миллиардер.
Дональд Трамп АҚШдаги энг йирик қурилиш компанияси, шунингдек, халқаро меҳмонхоналар ва казинолар тармоғи эгаси ҳисобланади. 2015 йилнинг июнь ойида у АҚШ президентлиги учун курашишини маълум қилди. Трамп муҳожирларга нисбатан салбий муносабати билан танилган.
Хусусан, у мексикалик бир қатор муҳожирларни жиноятчи ва зўравон деб атаган эди. Кейинчалик у АҚШни Мексикадан келган жиноятчилар учун мўлжалланган «ахлатхона»га қиёслаган, шунингдек, фарзанди АҚШда туғилган барча ноқонуний муҳожирларни болалари билан қўшиб мамлакатдан ҳайдашга чақирганди.
Изоҳ (0)