Афғонистоннинг Жарм шаҳридан 45 километр узоқликда, Ҳиндикуш тоғларида юз берган 7,7 магнитудали зилзила Ҳиндистон, Покистон ва Афғонистон пойтахтида ваҳимага сабаб бўлди. Бу ҳақда Russia Today хабар бермоқда.
Reuters’нинг гувоҳларга асосланиб хабар беришича, ерости силкинишлари Афғонистон пойтахти Қобул шаҳрида сезилган, биноларни ҳам қимирлатиб юборган.
NDTV’нинг хабар беришича, Ҳиндистоннинг Деҳли, Кашмир, Харяна ва Панжоб штатларида силкиниш айниқса кучли сезилган, пойтахт Деҳлида одамлар уй ва идораларни ташлаб кўчаган чиққан.
Сринагарда эса телефон алоқаси ва электр таъминоти узилиб қолгани айтилмоқда. Покистон пойтахтида Исломободда ҳам ваҳимага тушган одамлар кўчаларга чиқиб кетган.
Ҳодиса натижасида юз берган вайронагарчиликлар ва жабрланувчилар ҳақида ҳозирча ахборот йўқ.
Аввалроқ, маркази Ҳиндикуш тоғларида бўлган давомли зилзила Ўзбекистонда ҳам сезилгани ҳақида хабар берилган эди.
Изоҳ (0)