19 октябрдан 22 октябрга қадар Тошкент шаҳрида Латвия Республикаси Атроф-муҳитни муҳофаза қилиш ва минтақавий ривожланиш вазири Каспарс Герхардс бошчилигида тоза технологиялар соҳасидаги тадбиркорлар делегациясининг ташрифи давом этмоқда. Дастурга мувофиқ, 20 октябрь куни Ўзбекистон Республикаси Табиатни муҳофаза қилиш давлат қўмитаси раиси Б.Абдусаматов билан Латвия Республикаси Атроф-муҳитни муҳофаза қилиш ва минтақавий ривожланиш вазири К.Герхардснинг учрашуви, 21 октябрь куни Табиатни муҳофаза қилиш давлат қўмитасида экологик тоза технологиялар соҳасида ўзаро тажриба алмашиш бўйича амалий семинар бўлиб ўтди. Бу ҳақда Табиатни муҳофаза қилиш давлат қўмитаси Ахборот хизмати «Дарё»га хабар берди.
Латвия делегациясининг Ўзбекистонга ташрифи доирасида, икки республиканинг табиатни муҳофаза қилиш ташкилотлари раҳбарларининг режалаштирилган икки томонлама музокаралари билан бир қаторда Ўзбекистон Республикаси Ташқи иқтисодий алоқалар, инвестициялар ва савдо вазирлиги, «Ўзбекистон темир йўллари» акциядорлик жамияти раҳбарлари билан учрашувлар бўлиб ўтди.
Ўзбекистон Республикаси Табиатни муҳофаза қилиш давлат қўмитасида ўтказилган амалий семинар ҳамкорликнинг истиқболли йўналишларини муҳокама қилиш учун муҳим майдон бўлиб хизмат қилди. Семинарда Ўзбекистон Республикаси Қишлоқ ва сув хўжалиги вазирлиги, Савдо-саноат палатаси, Давлат геология ва минерал ресурслар қўмитаси, «Ўзкоммунхизмат» агентлиги, «Ўзбекэнерго», «Ўзкимёсаноат», акциядорлик жамиятлари, «Ўзбекнефтгаз» компанияси вакиллари иштирок этди.
Семинар давомида сувни тозалаш, сувни тайёрлаш, оқова сувларни қайта ишлаш ва тозалаш, чиқиндиларни йиғиш, қайта ишлаш ҳамда утилизация қилиш соҳасида, шунингдек, атмосфера ҳавосининг ифлосланиши юзасидан учинчи авлод технологиялари негизида мониторинг юритувчи компаниялар вакиллари ўз тақдимотлари билан иштирок этди.
Тадбирда «Ўзкоммунхизмат» агентлиги, Қишлоқ ва сув хўжалиги вазирлиги, «Ўзкимёсаноат» акциядорлик жамияти вакиллари ўз маърузалари билан қатнашди. Маърузачилар коммунал соҳасидаги экологик тоза технологияларни, сувни тежовчи ва коллектор-дренаж сувларни қайта ишлаш технологияларни жорий қилишга оид таклифлар ва кимё соҳасида тоза технологияларни қўллаш юзасидан лойиҳаларни тақдим этди.
Изоҳ (0)