19-oktabrdan 22-oktabrga qadar Toshkent shahrida Latviya Respublikasi Atrof-muhitni muhofaza qilish va mintaqaviy rivojlanish vaziri Kaspars Gerxards boshchiligida toza texnologiyalar sohasidagi tadbirkorlar delegatsiyasining tashrifi davom etmoqda. Dasturga muvofiq, 20-oktabr kuni O‘zbekiston Respublikasi Tabiatni muhofaza qilish davlat qo‘mitasi raisi B.Abdusamatov bilan Latviya Respublikasi Atrof-muhitni muhofaza qilish va mintaqaviy rivojlanish vaziri K.Gerxardsning uchrashuvi, 21-oktabr kuni Tabiatni muhofaza qilish davlat qo‘mitasida ekologik toza texnologiyalar sohasida o‘zaro tajriba almashish bo‘yicha amaliy seminar bo‘lib o‘tdi. Bu haqda Tabiatni muhofaza qilish davlat qo‘mitasi Axborot xizmati “Daryo”ga xabar berdi.
Latviya delegatsiyasining O‘zbekistonga tashrifi doirasida, ikki respublikaning tabiatni muhofaza qilish tashkilotlari rahbarlarining rejalashtirilgan ikki tomonlama muzokaralari bilan bir qatorda O‘zbekiston Respublikasi Tashqi iqtisodiy aloqalar, investitsiyalar va savdo vazirligi, “O‘zbekiston temir yo‘llari” aksiyadorlik jamiyati rahbarlari bilan uchrashuvlar bo‘lib o‘tdi.
O‘zbekiston Respublikasi Tabiatni muhofaza qilish davlat qo‘mitasida o‘tkazilgan amaliy seminar hamkorlikning istiqbolli yo‘nalishlarini muhokama qilish uchun muhim maydon bo‘lib xizmat qildi. Seminarda O‘zbekiston Respublikasi Qishloq va suv xo‘jaligi vazirligi, Savdo-sanoat palatasi, Davlat geologiya va mineral resurslar qo‘mitasi, “O‘zkommunxizmat” agentligi, “O‘zbekenergo”, “O‘zkimyosanoat”, aksiyadorlik jamiyatlari, “O‘zbekneftgaz” kompaniyasi vakillari ishtirok etdi.
Seminar davomida suvni tozalash, suvni tayyorlash, oqova suvlarni qayta ishlash va tozalash, chiqindilarni yig‘ish, qayta ishlash hamda utilizatsiya qilish sohasida, shuningdek, atmosfera havosining ifloslanishi yuzasidan uchinchi avlod texnologiyalari negizida monitoring yurituvchi kompaniyalar vakillari o‘z taqdimotlari bilan ishtirok etdi.
Tadbirda “O‘zkommunxizmat” agentligi, Qishloq va suv xo‘jaligi vazirligi, “O‘zkimyosanoat” aksiyadorlik jamiyati vakillari o‘z ma’ruzalari bilan qatnashdi. Ma’ruzachilar kommunal sohasidagi ekologik toza texnologiyalarni, suvni tejovchi va kollektor-drenaj suvlarni qayta ishlash texnologiyalarni joriy qilishga oid takliflar va kimyo sohasida toza texnologiyalarni qo‘llash yuzasidan loyihalarni taqdim etdi.
Izoh (0)