Ўзбекистон Республикаси Президенти Ислом Каримов барча пахтакорлар ва меҳнаткашларни Давлат пахта режаси бажарилгани билан табриклади. Табрик матни Ўзбекистон Миллий ахборот агентлигида эълон қилинди.
«Аввало, сиз, азиз деҳқон ва фермерлар, сувчи, агроном ва механизаторларни, барча дала меҳнаткашларини ғалла, пахта ва бошқа қишлоқ хўжалиги маҳсулотларини етиштириш бўйича шартнома мажбуриятларини адо этганингиз билан самимий муборакбод этишни ўзим учун катта шараф деб биламан», — дейилади табрикномада.
Президент жорий мавсумда 7 миллион 300 минг тонна ғалла, 3 миллион 350 минг тоннадан зиёд пахта етиштирилганини таъкидлаб ўтди.
«Энг муҳими, етиштирилган пахта ҳосили ғоят қисқа муддатларда – 35—40 иш кунида йиғиб-териб олингани, унинг 90 фоизи юқори сортларга топширилгани камдан-кам учрайдиган ҳодиса, десак, ҳеч қандай муболаға бўлмайди», — дея қайд этди Ислом Каримов.
«Бугунги хурсандчилик кунда шартнома мажбуриятларини биринчилардан бўлиб бажарган Андижон, Бухоро, Хоразм, Қашқадарё, Навоий, Самарқанд вилоятлари ва Қорақалпоғистон Республикаси, шунингдек, барча вилоятларимизнинг пахтакорлари мамлакатимизнинг юксак хирмонини бунёд этишга муносиб ҳисса қўшганини мамнуният билан эътироф этамиз», — дейилади табрик хатида.
Президент шу борада Амударё, Қораўзак, Пахтаобод, Булоқбоши, Олот, Ромитан, Дўстлик, Миришкор, Касби, Қизилтепа, Мингбулоқ, Наманган, Каттақўрғон, Оқдарё, Сирдарё, Бўка, Юқоричирчиқ, Бешариқ, Ёзёвон, Тошлоқ, Хива, Янгиариқ, Қўшкўпир туманлари 20—25 иш кунида режани адо этиб, кўпчиликка ўрнак ва намуна бўлганини алоҳида қайд этди.
Изоҳ (0)