Халқаро воситачилар олтилиги (БМТ Хавфсизлик кенгашининг доимий беш аъзоси ва Германия) томонидан Европа Иттифоқининг ташқи ишлар ва хавфсизлик сиёсати бўйича олий вакили иштирокида Эрон билан 14 июль куни Венада имзоланган ядровий битим 18 октябрь, якшанба куни кучга киради. Бу ҳақда «Корреспондент.net» хабар бермоқда.
Эрон шу кундан эътиборан битим доирасидаги барча келишувларни расман бажариши шарт. Бунинг эвазига Теҳронга нисбатан аввалроқ жорий этилган барча халқаро ва бир томонлама санкциялар бекор қилинади.
Agence France-Presse’нинг дипломатик доиралардаги манбаларга асосланиб хабар беришича, Европа Иттифоқи 18 октябрнинг ўзида Эронга нисбатан барча санкциялар бекор қилинишини эълон қилиши мумкин.
Айни вақтда, Европа Иттифоқининг мазкур қарори жорий йил охирида МАГАТЭ томонидан Эрон битим шартларини бажаргани тасдиқланганидан сўнг кучга кириши мумкин. Эрон ўз ядровий дастури тинчлик мақсадларида фойдаланилишини исботлаб бера олиши зарур.
Изоҳ (0)