Xalqaro vositachilar oltiligi (BMT Xavfsizlik kengashining doimiy besh a’zosi va Germaniya) tomonidan Yevropa Ittifoqining tashqi ishlar va xavfsizlik siyosati bo‘yicha oliy vakili ishtirokida Eron bilan 14 iyul kuni Venada imzolangan yadroviy bitim 18-oktabr, yakshanba kuni kuchga kiradi. Bu haqda “Korrespondent.net” xabar bermoqda.
Eron shu kundan e’tiboran bitim doirasidagi barcha kelishuvlarni rasman bajarishi shart. Buning evaziga Tehronga nisbatan avvalroq joriy etilgan barcha xalqaro va bir tomonlama sanksiyalar bekor qilinadi.
Agence France-Presse’ning diplomatik doiralardagi manbalarga asoslanib xabar berishicha, Yevropa Ittifoqi 18-oktabrning o‘zida Eronga nisbatan barcha sanksiyalar bekor qilinishini e’lon qilishi mumkin.
Ayni vaqtda, Yevropa Ittifoqining mazkur qarori joriy yil oxirida — MAGATE tomonidan Eron bitim shartlarini bajargani tasdiqlanganidan so‘ng kuchga kirishi mumkin. Eron o‘z yadroviy dasturi tinchlik maqsadlarida foydalanilishini isbotlab bera olishi zarur.
Izoh (0)