«Локомотив» футбол клуби раҳбарияти ҳамда таъсисчилар томонидан ўтказилган йиғилишда жамоа бош мураббийи Вадим Абрамов ўз лавозимидан бўшатилгани маълум қилинди. Бу ҳақда клуб расмий сайтида хабар берилган.
Олий лиганинг 25-турида Қўқонга сафар қилган «Локомотив» олий лига дебютанти билан 2:2 ҳисобида дуранг ўйнаб қайтди. Бу ўйинда «темирйўлчилар» 2:0 ҳисобида олдинда бораётганди, бироқ баҳс тугашига 20 дақиқадан сал кўпроқ вақт қолганида дарвозадан иккита гол ўтказиб юборди ва «Локомотив»нинг чемпионлик учун имкониятлари яна пасайди. Қолаверса, асосий рақобатчи — «Пахтакор» ғалаба қозонди.
Шундай бўлса-да, Вадим Абрамовга клуб номидан миннатдорчилик билдирилган. «Локомотив» унинг қўл остида Ўзбекистон Суперкубогини қўлга киритди. ОЧЛда «Ал Садд» устидан Тошкентда 5:0 ҳисобида ғалаба қозонди. «Бунёдкор» Олий лиганинг ҳар икки учрашувида мағлуб этилди ва бу воқеа клуб тарихида илк бор рўй берди.
Вадим Абрамов билан биргаликда жамоани ёрдамчи мураббий Марат Мифтахутдинов ҳам тарк этди. Эндиликда мавсумнинг қолган беш ўйини учун Андрей Микляев ва Мирко Елечич клуб натижаларига жавоб беради.
Изоҳ (0)