Туркманистон ташқи ишлар вазирлиги Қозоғистон президентининг Туркманистон чегараларида юз берган ҳодисалар ҳақидаги баёноти муносабати билан норозилик билдирди. Бу ҳақда вазирлик матбуот хизмати хабар бермоқда.
«Туркманистон томони Қозоғистон томонининг Туркманистон давлат чегарасидаги вазият бўйича ҳақиқатга зид бу каби фикрлари юзасидан фавқулодда хавотир ва тушунмовчилик билдиради», — дейилади Туркманистон ТИВ баёнотида.
Баёнотда қайд этилишича, «Туркманистон томони мазкур ҳолат юзасидан қатъий норозилик билдиради ҳамда икки мамлакат ўртасидаги анъанавий дўстона муносабатлардан келиб чиқиб, бундан буён Қозоғистон томони Туркманистон атрофидаги вазиятни баҳолашда нисбатан холис ахборотга асосланишига умид билдиради».
Қозоғистон президенти Нурсултон Назарбоев 15 октябрь, пайшанба куни Россия президенти Владимир Путин билан биргаликдаги матбуот анжуманида, жумладан, шундай деганди: «Биз Туркманистон чегарасида юз берган ҳодисалар ҳақида биламиз ва Тожикистон учун қайғурмоқдамиз».
Изоҳ (0)